ಸಿಂಧನೂರು: ಸಾರ್ವಜನಿಕ ಸ್ಥಳದಲ್ಲಿ ಪಿಸ್ತೂಲ್‌ನಿಂದ ಗಾಳಿಯಲ್ಲಿ ಗುಂಡು ಹಾರಿಸಿ ಹೋಟೆಲ್ ಮಾಲೀಕನಿಗೆ ಹಾಗೂ ಸಿಬ್ಬಂದಿಗೆ ಜೀವ ಬೆದರಿಕೆ ಹಾಕಿದ ಘಟನೆ ತಾಲ್ಲೂಕಿನ ಇ.ಜೆ ಹೊಸಳ್ಳಿ ಕ್ಯಾಂಪ್‌ನ ಸಿರಿ ಫ್ಯಾಮಿಲಿ ರೆಸ್ಟೋರೆಂಟ್‌ನಲ್ಲಿ ಸೋಮವಾರ ರಾತ್ರಿ ನಡೆದಿದೆ.
ಗಾಳಿಯಲ್ಲಿ ಗುಂಡು ಹಾರಿಸಿ ಜೀವ ಬೆದರಿಕೆ ಹಾಕಿದ ಆರೋಪಿ ಕಲಬುರಗಿಯ ನಿವಾಸಿ ಹನುಮಂತಪ್ಪ ಎಸ್. ಜೇಮಶೆಟ್ಟಿ ಎಂದು ಗುರುತಿಸಲಾಗಿದೆ. ಸೋಮವಾರ ರಾತ್ರಿ ಆರೋಪಿ ಹನುಮಂತಪ್ಪ ಜೇಮಶೆಟ್ಟಿ ಕುಟುಂಬದೊಂದಿಗೆ ರೆಸ್ಟೋರೆಂಟ್‌ಗೆ ಊಟಕ್ಕಾಗಿ ಬಂದಿದ್ದಾರೆ. ಆ ಹೋಟೆಲ್‌ನಲ್ಲಿ ಮದ್ಯದ ಬಾಟಲಿ ಇಟ್ಟು ಸಿಗರೇಟ್ ಸೇದುತ್ತಾ ಕುಳತಿದ್ದಾನೆ. ಆಗ ಹೋಟೆಲ್ ಸಿಬ್ಬಂದಿಗೆ ಹಾಗೂ ಮಾಲೀಕ ನಾಗೇಂದ್ರ ಅವರಿಗೆ ಅವಾಚ್ಯ ಶಬ್ದಗಳನ್ನು ನಿಂದಿಸಿ, ನನ್ನಲ್ಲಿ ರಿವಾಲ್ವರ್ ಇದೆ. ಅದನ್ನು ತಂದು ಶೂಟ್ ಮಾಡುತ್ತೇನೆ ಎಂದು ಹೇಳಿ ಹೋಟೆಲ್‌ನಿಂದ ಹೊರಗಡೆ ಹೋಗಿ ತನ್ನ ಕಾರಿನಲ್ಲಿದ್ದ ರಿವಾಲ್ವರ್‌ನ್ನು ತೆಗೆದುಕೊಂಡು ಒಂದು ಸುತ್ತ ಗಾಳಿಯಲ್ಲಿ ಗುಂಡು ಹಾರಿಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ನಂತರ ಕುಟುಂಬದ ಸದಸ್ಯರು ಆರೋಪಿ ಹನುಮಂತಪ್ಪ ಜೇಮಶೆಟ್ಟಿ ಅವರನ್ನು ತಡೆದು ಪಿಸ್ತೂಲ್ ಕಸಿದುಕೊಂಡಿದ್ದಾರೆ. ಉಳಿದುಕೊಂಡಿದ್ದೀಯಾ ಇನ್ನೊಂದು ಸಾರಿ ನನ್ನ ಸಂಗಡಿಗರೊಂದಿಗೆ ಬಂದು ನಿನ್ನ ರೆಸ್ಟೋರೆಂಟ್ ಗತಿ ಕಾಣುಸುತ್ತೇನೆ ಎಂದು ಜೀವ ಬೆದರಿಕೆ ಹಾಕಿದ್ದಾನೆ ಎಂದು ತಿಳಿಸಿದ್ದಾರೆ. ಈ ಬಗ್ಗೆ ಸಿಂಧನೂರು ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
